一個好撐人家出海觀光朞出事故爻，撥一個討海人救轉起。箇好撐人家決定畀箇討海人無數鈔票報答佢。佢提出兩個方案：一是瑲朞便畀佢家財個百股之五送畀討海人；另外一嘅是等十年後，畀自己到時候家私個百股之廿贈佢。

嘅是從天上脫餅個好事幹，討海人當然怎兒個快活，同時貤猴難過：選第一個方案勿，只𢞕十年後富翁個家私劇增，到時後悔爻；選第二個方案勿，貤𢞕十年後富翁個家私嚴重縮水甚至破產，自己勿空死啊？

故事先講㙮止。空是問討海人後晚選解某爻，搭我慢底交代。現實當中，選法遍佈在我搭爾生活個時時刻刻。冰箱開爻，空把菜蔬樣數多，爾便約選到底約做解某；衣裳櫥開爻，空是裏向一拔陣大個衣裳，爾便約缺眼心思；空是爾標緻險，“丘比特個箭”只摸爾射來，爾便會徠幾個備選者當中難過；空是爾屋裏條件猴好，爾坐可會撥清閒“吃老本”也是創業做大事幹難牢定。購物為解某講蕩街？還勿是眼頭前忒多物事爻，一朞向選弗來爻。

搭許向，一時講弗完。

假忖忖忖向，空是冰箱裏便剩獨樣菜蔬，衣裳櫥裏只頭二件衣裳；空是爾便公道條件……咸裏馨多个選法畀爾煩？

望起，有得選忒多，弗一定便是好事。

瑲朞，我好搭爾講討海人个選法：佢為箇兩個選法頭髮都忖空心爻止、嘸魂搭腔，第二日兒討海到浪打來貝拖去爻。佢塌爛到嘸眼選權爻。